記者獻身實測 首爾婚攝 甜蜜過程全面睇
記者獻身實測 首爾婚攝 甜蜜過程全面睇 I 新假期
近年流行 首爾婚攝 ，個個去完都話正過喺香港影100倍，價錢唔貴而且相片質素超水準！究竟只係「外國的月光特別圓」？而且人生大事又是否真係值得「揀首爾、棄歐洲」？今次由記者親自出馬，同相識7天的Model Esterlie齊齊「獻身」去首爾影無戀愛婚攝，試勻韓式化妝、揀婚紗、影室內Studio、曝曬外景拍攝、甚至挑戰傳統韓服婚攝，為大家睇睇韓仔攝影師影出嚟啲相係咪特別靚！
01| 明星級化妝享受 但真係要等3個鐘……？
無錯！事前被通知要5：30am 集合，就係要去化妝！由助手初步整理髮型已經用咗1個鐘，最誇張是化妝，淨係睇到枱上放滿化妝品實在嚇一嚇，而專業化妝師行動前會了解你平日的化妝習慣，再挑選適合的妝容，Esterlie 都大讚：「好似變咗韓星，享受明星級服務！」期間更會「化到上心口」以防膚色不一，實在超專業！最後由Stylist 作最後整理，真係足足用了3個鐘，不過睇住Esterlie 由港女變韓風女神（真心覺得靚咗），佢自己都形容妝容「零死角無瑕疵」，比起香港化妝3個鐘化晒新娘+所有伴娘，就知道值回票價吧！不過以上過程屬於女士專用，男仔Set 頭化妝一個鐘搞掂，其餘時間？慢慢等吧……
睇睇枱上的化妝品，Esterlie見到勁興奮，淨係打底都已經用咗4款粉底液，難怪個妝持久又無暇！
男士妝容唔會太誇張，反而髮型會比較花心思！當地男士興露額Style，M字額男士唔想出醜記得出聲！
等……等……等……3個鐘的過程，男士有2個鐘都係等！
去到婚紗店，見到100+款婚紗已經見頭暈，仲未計男士禮服都有50+，好彩度身後有「阿朱媽」專業推介。
Alex:「男人等老婆係天公地道，不過都建議帶定充電器，因為我電話睇劇打機玩到無電！」
02| Studio出現假膠花 影相會出事嗎？
唔洗驚！因為有專業名師操刀，執相後會有奇蹟出現！雖然去到Studio見到「深圳版」場景實在失望，場假玫瑰睇落真係非常假，我同Model都嚇一跳：「山長水遠過到嚟，竟然影假花？」好彩專業攝影師Jun Chae開會講解攝影過程同了解想要的感覺，所以影相過程算順利，不過攝影師要求極高，個頭郁少少都會被要求改正，真係放鬆少少都唔得，專業Model Esterlie 都話辛苦！不過由出名攝影師操刀，執完相真係有驚喜，復古效果令照片有唯美感，攝影師又捕捉到深情對望一刻，同事一睇到都讚靚，看來韓國人執相真係有一手，好滿意！
你睇！啲花真係好膠！當初見到呢個情況，我真的很擔心。
拍攝前會先開會講解新人有咩要求，記得出聲。
Esterlie非常滿意的作品，話就算有網紗，隻眼都有執大咗！
成功！假膠花場景執相後有Filter同Effect，張相立即靚咗100倍！
韓國婚攝主打復古風格，執相後浪漫感覺大大提升。
03| 天台暴曬 為影一張相可以去到幾盡？
睇朋友去首爾婚攝，去一個場面可能只係為影一張相！影婚攝時正值八月，今次被要求烈日當空上天台暴曬，就只為一張婚紗飄逸的相。張相要求係要我同Esterlie 深情對望鼻碰鼻，就Pose 而言其實唔算困難（我們都是專業的），但婚紗飄逸的效果就要助手在按下快門的一刻幫忙拉線，要計準時機真係要花功夫，經歷了無盡挫折後，試了30分鐘終於成功，以為大家可以拍手收工？錯！攝影師Jun Chae 叫大家繼續，因為婚紗形狀唔夠完美，最終為了這張相足足試了1個鐘！你問值唔值得？話晒係人生大事，機會只得一次，而且攝影隊長勁有心機陪你慢慢試，辛苦1個鐘換來超靚作品，點計都有著數吧！
實在太熱，一有時間都要躲在樹下休息！
影相時正值中午12點，烈日暴曬！執相後竟然有夕陽，韓劇Feel滿分！
睇落好似好浪漫？其實Esterlie當時係直視太陽，影到流眼淚！
每逢大時大節，韓國人都會穿著傳統韓服，結婚當然唔例外，加上近年亦興起韓服婚攝，我同Esterlie 當然要一探究竟！換衫上其實比較麻煩，因為要在車上更換，而且香港人一定唔識著，好彩整個拍攝過程有一位阿朱媽跟身，除了幫手補粉吸面油，換韓服真係靠晒佢！會有禮儀要遵守嗎？問過隨行翻譯，其實並不嚴格，但提提女士唔好太粗魯，事關韓服是韓國傳統象徵。而影相時反而好好笑，因為攝影師要求我同Esterlie 擺的Pose 實在非常「傳統」，例如Esterlie 要雙手拎起裙尾扮怕羞；我深情望佢時要左手放後腰，影出嚟的效果就似「唐伯虎點秋香」！不過Esterlie 非常「冧冧豬」，原來佢話「比起婚紗，更想影韓服，因為一生人一次好特別」，所以男士們想哄老婆仔，值得一試呀！
04| 韓服婚攝 值唔值得試？
韓服唔一定影到好傳統，今次去壁畫村，同卡通影仲特別吧！
由於經常面貼面，吸氣呼氣時對方一定感覺到， 忍唔住笑就會失敗，NG！
港女必試粉紅款，但如果想結婚感重啲，可揀較華麗的款式！
韓服裙擺非常長，行路時經常要拎起，以免整污糟要賠錢！
05| 首爾婚攝多數一式一樣 如何可以影到有驚喜？
好多人喺韓國影婚攝，都會著禮服去大路靚景點，著韓服時就去韓屋村，其實好悶喎！近期韓劇大熱穿越時空（《閣樓皇太子》、《仁顯皇后的男子》，甚至剛開播的《步步驚情－麗》都係類似主題），所以今次決定反傳統，試試著禮服去韓屋村影，營造新舊反差感，效果原來都唔錯喎！問過攝影師，原來好少人會有呢個要求，所以會有新鮮感，不過戶外景+3件套裝禮服，真係熱到差啲中暑，所以勸大家秋天才是去首爾婚攝的好季節！要留意的是，韓屋村要遊客必到景點，拍攝當時有超大班人圍觀，仲慘變布景板被要求合照……Esterlie 惟有安慰自己：「我人生第一次被人叫合照呀！」而翻譯Karen 就推薦怕尷尬者可揀平日早上去影，咁就唔怕做布景板啦！
著禮服去韓屋村影，好似穿越時空，感覺幾特別！
在湖邊深情對望非常有意境，被同事評為Best Pick之一！
年輕新人可叫攝影隊準備可愛小道具，影出嚟效果帶玩味感，唔錯！
夏天影戶外婚攝實在太熱，好彩有自備巴蕉扇（當然……全程都係讓咗畀Esterlie的）。
查看原文
推薦閲讀
